Բոցենի հուրանավոր - Флокс метельчатый - Phlox Paniculata

Բոցենի ցեղի ներկայացուցիչները միամյա կամ բազմամյա բույսեր են` ծագումով հիմնականում Հյուսիսային Ամերիկայից: Հայտնի է բոցենու մոտ 60 տեսակ: Պատկանում են զարմանազանազգիների ընտանիքին: Հուրանավոր բոցենին  բազմամյա է, որից ստացվել են կուլտուրական բազմամյա ֆլոքսի բազմաթիվ սորտեր:

Ուղիղ վեր ձգվող ընձյուղներով բույս է` 50-150 սմ բարձրությամբ: 1,5-5 սմ տրամագիծ ունեցող բուրումնավետ ծաղիկները, որոնք բացվում են հուլիսից մինչև ուշ աշուն, ունեն ամենաբազմազան գունավորում, բայց ավելի հաճախ` ալ կարմիր, կարմրանարնջագույն, նարնջագույն, մանուշակագույն և այլն: Հավաքված են հուրանանման ծաղկաբույլերում: Բազմանում են կտրոններով, թփի բաժանմամբ և արմատային մացառներով: Գարնանը, երբ  ընձյուղները հասնում են 8-10 սմ երկարության, կտրոններ են վերցնում և տնկում ստվերոտ մարգերում կամ սառը ջերմոցներում: Արմատակալելուց հետո հաջորդ գարնանը տնկում են մշտական տեղում: Թուփը բաժանման համար կիսում են ծաղկելուց հետո կամ գարնանը: Լայնորեն է մշակվում միքսբորդերում, լանդշաֆտային ձևավորումներում, գազոնի ֆոնի վրա:

Կան բազմայա բոցենու տեսակներ, որոնք օգտագործվում են որպես միամյա: Այդպիսիներից է Դրյումոնդի բոցենին: Խիտ թփակալող բույս է` 20-60 սմ բարձրությամբ: Ծաղիկները բուրավետ են, տարբեր գունավորմամբ: Լուսասեր և ջերմասեր է, լավ է աճում ինչպես մերձարևադարձային, այնպես էլ  բարեխառն գոտու պայմաններում, միայն թե մեզ մոտ բաց գրունտում թողնելու դեպքում  լրիվ ցրտահարվում է: 

Հարցեր, պատասխաններ, մեկնաբանություններ